"Sino ka?" tanong niya sa akin.
"Ha? Ako?" tanong ko sa kanya. Hindi ako sigurado kung ako nga ba ang kinakausap niya.
Nakatingin lang siya sa akin, hindi nagsalita. Matagal. Para akong binabalatan. Hindi ko natiis ang mga mata niyang parang pinapasok ang kaluluwa ko.
"A-ako, ako po si K-Kor." Hindi ko rin alam kung bakit ako kinakabahan. Hindi naman ito interview. At higit sa lahat, hindi ko siya kilala. Ano nga bang kinakatakot ko. Hindi rin naman siya mukhang holdaper.
"Ok, Kor. Gusto mo ba akong maging girlfriend?" Inakbay niya ang kanyang braso sa aking balikat, tumingin sa mata ko at kumindat. Tumalon ang puso ko, literal, muntik ng lumabas sa aking dibdib, buti na lang at napigilan. Nakatulala lang ako sa kanya. Tiningnan ko siya na parang hibang. Girlfriend? Girlfriend? Girlfriend? Hindi maalis sa utak ko ang salitang girlfriend.
"Huy, tinantanong kita." Sinampal niya ako ng mahina sa pisngi. Nawala ako sa kamalayan.
Ha, lang ang nasagot ko sa kanya.
"Ayaw mo ba?" tanong niya ulit sa akin.
Sa totoo lang hindi ko alam ang isasagot ko. Ngayon ko lang nakita ang babaeng ito. Ni hindi ko pa nga alam ang pangalan niya. Pero ayaw ko rin namang palampasin ang pagkakataon na magkaroon ng girlfriend. Saan ka ba nakakita ng babaeng nag-aalok na maging girlfriend niya.
"Pwede bang pag-isipan ko muna?" tanong ko sa kanya.
"Sige, pero mga limang minuto lang. May lakad pa kasi ako."
Tiningnan ko siya. Hmm... Mas matangkad ako ng kaunti sa kanya kaya ayos lang sa height. Maputi naman. Sakto lang ang tangos ng ilong sa mukha. Manipis ang labi pero mahaba ang guhit. OK naman yung ngipin. Yung mata niya. Yung mata niya ang hindi ko matiis. Para akong kinukulong sa sarili niyang mundo pag tinitingnan niya ako. Yung boobs niya, sakto sa kamay ko. Ano kayang cup niya. Pag sinagot ko siya at naging girlfriend, free access na ako sa boobs niya! Shet. Baka nga higit pa eh. Hi hi hi. OK decided na.
"OK, sige payag na akong maging girlfriend ka." Nginitian ko siya pagtapos ng matinding pag-iisip at pagtimbang.
"Nakatingin ka sa boobs ko."
"Ah eh, sorry." Napahiya ako dun ah. Hindi ko nalabanan ang pagiging lalaki ko. Baka isipin niya na sinagot ko lang siya dahil sa boobs niya.
"Siguro pumayag ka lang dahil gusto mong mahawakan ang boobs ko no?"
"Ha? Hindi ah. Sinagot kita kasi, ano..." Ano nga ba.
"OK lang. Mahahawakan mo din yan basta pasayahin mo lang ako."
"Talaga?" Talaga? Talaga? Talaga? As in? Hindi ko napigilan ang aking ngiti. Paano ko kaya siya mapapasaya. Yes, sa wakas, makakahawak na rin ng boobs ang aking mapapalad na palad.
"O siya. Samahan mo na ako."
"Saan?"
"Basta akong bahala sa'yo. Isipin mo na lang na ito ang first date natin."
"May trabaho pa ako eh."
Huminga siya ng malalim, "OK, ano ang mas importante, pera o pag-ibig?" tanong niya sa akin.
Ano bang isasagot ko. Malamang pag sinagot kong pag-ibig pipilitin niya akong sumama sa kanya at huwag nang pumasok sa trabaho. Pag trabaho naman ang pinili ko, baka makipagbreak na agad siya dahil hindi naman pala siya ang priority ko. Hindi ko na mahahawakan ang boobs niya. Umasa lang ako sa wala. Ano ba. Ano bang gagawin ko. Ito na siguro ang pinakamahirap na desisyon ko pagdating sa pag-ibig.
"Huy. Ano na? Pipili ka lang naman ng isa, pag-ibig o pera. Ano ba sa tingin mo ang mas mahalaga sa'yo. Huwag kang mag-alala hindi kita pipilitin."
"Ahh. Pag-ibig na lang siguro."
"O yun naman pala eh. Tara na." Hinatak niya ang kamay ko hanggang sa makasakay na kami ng taxi. Anong sasabihin ko bukas nito sa boss ko? Anong palusot ko? Kaka-leave ko lang noong nakaraang linggo eh. Hay, bahala na. Pinili ko ang pag-ibig eh. At least may girlfriend na rin ako.
